Угро-Русе моя мила

Окрем карпатской домовины жиют Русины як приселенцѣ… Найвекша комму­нита мимо их домовины ся находит в ЗША. В 1880–1914. роках ся за море выселило коло 225 000 карпатскых Русинов… Середный одгад назначуе, же у свѣтѣ их е коло 1 600 000.

П. Р. Магочий 

Текст №552 проиллустровали сьме фотом з обкладкы другого выданя по­зна­того в Америцѣ авто­био­графичного романа Out of This Furnace. A Novel of Immigrant Labor in America by Thomas Bell (1941, 1976), у котром зображеный живот трех генераций русинскых ро­ботников в Америцѣ. Автор, Томаш Михайлов Белейчак – сын Михайла Белей­чака з Нижного Тварожця на Пряшов­ской Руси, одвандровавшого до Америкы за роботов и трагично загыблого на фабри­цѣ у Пит­тсбургу. 

Угро-Русе моя мила,
краю мой родненькый,
я тебе не полишу,
хлопець молоденькый.

Я тебе не полишу,
в тобѣ хочу быти,
на котрой ся землѣ родив,
в той буду и жити.

Под сим царем, под угорскым,
дуже добре жити,
куда хочу, туда пойду,
за гроши робити.

Йдуть Руснакы в Бразилию,
газдовства продають,
де им отець-мати жили,
там Жиды вайкають.

Ой, не пустять тя, Русине,
ити в Бразилию,
теперь ты ся изостав,
як голый у терню.

Ой, ты гадаш, Русине,
в Бразилии горазд,
поплачеш ты, побануеш
за Угорщину нераз.

Жерело: Угро-Русски Народны Спѣванки. Издалъ Михаилъ Врабель
Томъ I. Спѣванки Марамарошски. Будапештъ 1900. № 552.