В чужинѣ

Молодый Павлович, зоставши сиротом, перебывал у Львовѣ, у свого уйка, и вернув ся домов як "полячок". Пак учил ся межи Сотаками, а пак у Мишковцю, межи Мадярами. Свои чуства з перебываня далеко од родного дома згорнул у наслѣдном вершу. Подля рукописа, представеного в выданю Ивана Шлепецкого (1955), твор мал назву Отечество, а в выданю Ивана Поливкы (1920) названый В чужинѣ.

Я несчастный в чужом краю –
Як сирота жыю я,
Все о тебѣ я думаю,
Родная земле моя.

Там, де Бескыды, Карпаты
Там, там моя отчина,
Там жые мой отець, мати,
Сестры, братя – родина.

Они за мнов ся старают:
Як я жыю в чужинѣ ?
Я за ними воздыхаю
И по сто раз в годинѣ.

О, родная земле мила!
Розмышляю о тебѣ,
Твоя магнетова сила
Мене тягат ко себѣ.

Не тѣшат мня чужы краи,
Их роскошы, выгоды,
Ми на мысли нашы гаи,
В студенках свѣжы воды.

Милы ми, милы Бескыды,
Де жые мое племя,
Де жыли мои прадѣды,
Там жыти жадам и я.

Боже, дай скоро узрѣти
Село, святый храм-церков!
Там Богу ся помолити
За душы моих предков.

Памятник А.Павловичу у Свиднику,
автор: Fero Gibala