|
Сушедова Ганїчка
барз вредна дзивочка.
Нєпреривно є у роботи
и нє ма часу за дурноти.
Ганїчко, мила душичко,
отвор сушеди дзвери!
Принесла нам колачи
и за тебе слатки жувачи.
–Нє можем тераз, мамо,
мам мобилне порученє,
а попри шицкого того
мам вельо того за ученє!
–Ганїчко, красна ружичко,
идз купиц хлєб и млєко,
у сушедстве тарговина,
та ци не будзе далєко.
–Не можем тераз, мамо,
праве сом на интернету,
а дакус познейше мушим
вежбац на кларинету!
–Ганїчко, мила душичко,
закукнї до ладички,
чи сцигла розгляднїца
од нашей нини Ружички.
–Не можем тераз, мамо,
патрим филм рисовани,
а споза того випробуєм
за жиму ципели скоряни!
Сушедова Ганїчка
барз вредна дзивочка.
Нєпреривно є у роботи
и не ма часу за дурноти!
|
Наша Анця, Аничка
дуже рядна дѣвочка.
Мае фурт она роботу,
не е часу на дурноты.
Аничко, душочко мила,
йди, отворь сосѣдцѣ дверѣ!
Бо принесла нам колачи
и тобѣ солодкы жвачкы.
–Йой, теперь од мня не жадай,
в мобил СМСку складам,
а попри вшыткого того
нам дали ся вчити много!
–Аничко, красна ружочко,
бѣж купити хлѣб, молочко,
продавалня коло нас е,
то не возьме много часу.
–Я теперь нияк не можу,
правѣ ем на интернету,
а дакус позднѣйше мушу
вежбати на кларинету!
–Анцько, золота дѣтинко,
кукни до поштовой скрынькы,
бо вже чекам довго дуже
карточку од теты Ружи.
–Я теперь не можу, мамо,
бо йде филм анимованый,
а пак треба ми ся брати
новы чижмы пробовати!
Наша Анця, Аничка
дуже рядна дѣвочка.
Е у неѣ фурт робота,
не е часу на дурноты.
|
