Як перестав газда свою жену бити
Газда Василий лем что женив ся на первой красавицѣ Гафии Ковач, котру он дуже любив за ей «говорчивость». Сам Василий быв натуры тихой, болше мовчав, як бы говорив, и дуже любив слухати розговоры другых, особенно, кедь розговоры были умны. Он так и розсудив: Гафия буде «щебетати», а он буде ю слухати, и то буде так добрѣ. На то он и не думав, ож «щебетание» Гафии ему може даколи и надоѣсти.
Прошло лем даколько дни послѣ свадьбы и Василий замѣтив, ож «щебетание» постепенно переходит в якый-то другый тон, котрый в теории музыки и не находит ся; но он думав, ож сеся перемѣна лем на переходный час, и прото мовчав, нич не говорив и даже чинив ся, ож нич не замѣчае.
Еден раз пришов Василий дому послѣ роботы и вмѣсто того, обы достати «вечерю», услышав, ож Гафия посылае го за водов, по тому еще что-то его хотѣла заставити робити, при чом, не переставая, доказывала Василю, ож он не такый муж, як другы, и мало старае ся о своей женѣ. И кто знае, что бы еще наговорила Гафия, но Василий уже не мог дале выдержати, пригадав собѣ пословицу «добры грошѣ личены (почислены), а жена бита» и, довго не розсужуючи, подняв руку на свою «божену» жену. Он знав добрѣ, ож нѣт такой заповѣди, чтобы заказовала мужу покарати свою жену.
Послѣ сего часто случало ся, ож Василий поднимав свою руку на Гафию, что и помогало. Лем же Гафия не была сим довольна. Она уже и лишала Василия и бѣгала к родителям, но там оставати ся довго не могла, зато и рѣшила пойти за совѣтом к едному духовнику, котрый быв извѣстный, ож на вшитко давав лѣкарство.
Пошла она к тому духовнику и росповѣла ему о своей бѣдѣ. Духовник пошов до другой комнаты, принес одты едну фляшочку с течов, похожов на воду, передав Гафии и казав: «Як прийде твой газда дому сердитый и захоче тя бити, та возьми мало сего лѣкарства в рот и держи в ротѣ дотоль, доколь не перейде го гнѣв».
Гафия взяла лѣкарство и пошла дому. Указало ся, ож лѣкарство было доброе. Василий даколи прийде дому сердитый, Гафия возьме в рот лѣкарство и держить его в ротѣ и мовчить, доколь не перейде гнѣв Василия. Перестав он гнѣвати ся и опят у них жизнь иде по доброму. Но лѣкарство скоро Гафия изхосновала, а кой не было лѣкарства, Гафия не могла здержати ся, обы не подразнити Василия бесѣдов. Кончило ся опят тым, ож Василий знова побив ю.
Пошла Гафия опят к тому духовнику попросити, обы знова дав того лѣкарства. Но духовник на сей раз не дав ей лѣкарства и казав: «Лѣкарство, котрое я тобѣ давав, была обычайна вода, а од биткы тебя спасала не лѣкарство-вода, но твоя мовчаливость. По сему, кой видиш, ож твой муж сердитый, ты мовч, а не серди его болше, и не будеш бита».
Гафия подяковала за совѣт, котрый потом и исповняла, так ож уже и не требало ей лѣкарства.
(Записано в Лоховѣ)
Жерело: Русский народный календарь на год 1937.
Издание О-ва А. Духновича в Ужгородѣ. Сс.106–107.