Як Русин мѣряе далекость?

Як Русин мѣряе далекость? Будучи в Керецкых, звѣдаю ся тамошного газду:

— Прошу вас, як далеко одси до Свалявы?

— Ой, паночку, то еще, еще добра махачка!

— А до Хуста як далеко? 

— Буде то двадцять километров з гаком!  

— Якый то вы гак кажете?

На сесе озвав ся якыйсь другый Русин:

— Та тото так, паночку, ож 20 километров проженете за двѣ добры годины, а тот гак, то лиш такый: раодаш*, треба на него раховати, кедь ся вам колесо по дорозѣ поламле. Такый, собѣ незначеный час: може быти два ферталѣ, але можут и двѣ годины.

раодаш мад. – надвышка

Жерело:  Карпатска Недѣля, 14. апрѣля 1940. Стор. 2. Пише Ядор Бѣленькый.