За майстра Митра

Корытнянскый майстер Митер
править вѣдра и корыта.
Знавуть майстра з Корытнян
кажда панѣя и пан.

Уйко Йван до Корытнян
за вѣдром прийшов з Горян,
а за ним из Керестура
на бицигльох бачи Дюра.

Пак из Мокрой позвонили:
тристо вѣдер попросили.
Бизнисмены из Рекыт
заказали сто корыт!

Пану Проктерови Митер
справив лавор и корыто,
обы годен свого брата,
пана Гембла окупати.

А из Рима на ракетѣ
прилетѣв синьор Спагетти,
а из Прагы – пан Прохазка,
а зо Жмеринкы – Параска,

панѣ Бася – из Креницѣ,
из Кишварды – нийна Ица,
Гита й Зита – из Лумшор…
Вшиткых много, довгый шор.

Зйойкав Митер: «Доста было!
Як есьте ми надоѣли!
Буду фирму закрывати,
пойду свѣтом вандровати.»

Жерело: Русинська пажить. Антологія русинськых поетув Закарпатя. Ужгород. «Патент». 2012. 349–350.