Жаба

(По Лаборскому выражению)

Што там кричит,
А што гучит,

Якый дѣдко наперат?
Ци то рано, ци то з ночи,
Ци в полудне, ци в полночи
Скарѣдно ся раздерат?

Чей сорока
Бѣлобока ?

Чей ворона ся давит?
Скреже зубами: кра, кра, кра,
Дусит ся грудьми: ква, ква, ква,
Ачей дѣдко ся бавит?

То мереке,
То береке,

Коа, трете, трити, тав;
Гучит, ги сова: гу, гу, гу,
Скучит, ги туток: ту, ту, ту,
Бреше, ги пес: гав, гав, гав.

То не птица,
Бо галица

Не на деревѣ черчит,
Ай по млацѣ чеперит ся
И у воду занурит ся,
По болотѣ верещит.

Теперь знаю,
Понимаю,

Што за бѣда так бреше:
То страпата, коропата
Ряба жаба; ой проклята,
У болотищу креше

О, ждай, ряба,
Брыда жаба, —

Дѣдко бы тя брав и чорт! —
Придут Нѣмцы, рукавицы
Стягнут ти и ногавицы,
Замовкне твой громкый рот.

(Избранныя сочиненія Александра В. Духновича.
Стихи и проза. Унгваръ – Ужгородъ. 1941. 27–28)