Злодѣй из супермаркету
Добрый учитель тот, котрый свого ученика приучат до самостойного думаня, до творчого осмысленя предмета. И кедь то му ся удаст, та може пак быти онь зачудованый, до якых высот ся можут ученикы достати.
Присѣв ку мнѣ у желѣзници злодѣй из супермаркету, а мнѣ краснѣ поздравкав и ословив мня на ймено. Но, я спочатку не знав, кто то е, спочатку ем не знав, бо зачав гнедь тым, же он у супермаркетѣ крав и быв поиманый. И зачав ми объясняти суперпричину свого суперлюдского дѣланя.
– Вы знаете, что ем тым супер фигльом хотѣв указати?
– Но, были сьте любопытливы, як ся то скончит…
– Нѣт… любопытливость е наивность и легкомыселна дурнота! Кебы-м терпѣв од любопытливости, та бы-м ся пустив до граня лотерии.
– Но, здаст ся, же то робите з ласкы ку адреналиновым ситуациям.
– Ха, я взяв лем еден-единый хлѣб. Тримав ем го у поднятой руцѣ и так ем з ним перешов коло кассы без заплачѣня. И пак ем быв поиманый.
– Но, и достали сьте пак покуту?
– Гей, але кто бере хлѣб, не е живан! Я им повѣв, же хлѣб подля старой справедливости принадлежит вшиткым дыхаючым.
– Ах, але чом то гварите правѣ менѣ?
– Я ем Борис М., якого сьте учили. Памятаете, что сьте все повторяли? Же кедь хочеме, обы быв свѣт справедливый, треба зачати од себе. А не е справедливостьов жадати про вшиткых фалаток хлѣба?
Настала тихота…
Присмотрийте ся вшиткы, як, уж Бог знае по колько раз, докажут ученикы перекрутити слова учителя! Але ай так ем го, чудака, похвалив.
Жерело: Радио Патрия, 19.12.2010, адаптовано