Зо Словаками в едном купе
В животѣ мусиме контактовати ся зо всякыма людми. Проблемы народностных и конфесийных односин в реалности не все вызирают так гладко, як то нам звыкли указовати телевизия и одповѣдны за то чиновникы. О едной такой встрѣчи вспоминат автор во своем ессею.
Путовало ся до Банской Быстрицѣ. До купе по дразѣ ся насходжало повно котрых одкы позберанцьов. … Лем цоркотаня вагоновых колес одбивало од нас стыдливу тихоту. В кешени ми забрынѣв мобил, и ся озывам, як усе, по русинскы. Телефонуе ми Марта и ся просит, як ся ей мужови дарит у дразѣ. Додават ку тому пару дробностей, тай так, як усе на конець:
– Лем си, хлопе мой, здравя бечелуй!
– Ай ты, ласко моя! – гварю.
Позад того ем вытягнув з ташкы цукрикы и понукнув вшиткых за рядом, что каждый сопутник оцѣнив. Сива старулька собѣ похвалюе, же суть добры, зато ей ще спонукую, а не одмѣтат. Люде в купе ся розтопили. Бабка констатуе, же ем Русин, и же ся ей любит моя културность, бо-м свою паню ословив ласков. На то неспокойный тридцятник збулькотит, ци ми смакуют словацкы цукрикы.
– Не будьте, молодый пане, форкливый и неслушный, – одотне му бабка. Что е солодке, то е каждому приемне.
– А цукрикы, мимоходом, суть польскы, – додавам.
– Так нас понукнийте русинскыма!
– Что сьте вы за христианин? – знова знепокойнѣе бабка.
– Ем словацкый римокатолик. А вы?
– Я ем… евангелицкой вѣры.
– Ага! Лютеранка?
– Истотнѣ.
– Все сьте были проти нам!
– Но, довольте!
– Тоты вашы псевдовѣры – то суть лем погниты конарчикы, что упали из римокатолицкого дуба. Видите: щи ай цукрикы, что их ѣсте выробили римокатолици. Мы сьме даяка сила!
– Виджу, же сьте моцно културный.
– Я ем лѣсный инженер.
– Не гварьте!
– А вы?
– Хлопче мой! Я одслужила штыри десятьроча як лѣкарька хирургии. А уж з вами не мам, што бесѣдовати.
– Вы, пане, кедь можу ся попросити, якой вѣры?
– Я хоть бы быв ай римо-, ай евангелик, лем абы быв покой, – гварю.
– Добрѣ гварите.
– Ем православный.
– Но, прошу! – зась наступлят лѣсный инженер. – Зато вам двом так пасуе! Лем так про любопытливость, но лем, приятелѣ, двигнийте руку, котры сьте ту словацкы римокатоликы?
И вшиткы, мимо бабкы и мене, подняли…
Одтогды знам, же е их веце. Но, исто, инженера такого розсягу лем так не стрѣтиш! Хыбаль, у амазонском пралѣсѣ. По том сьме из пензионованов дохторков выступили у Банской Быстрици. Сконстатовала:
– Хотѣв образити вас, но мене образив. Кто у собѣ чести не мае, не може ньов общастнити ани другых.
Из Банской Быстрицѣ домов уж то таке интересне не было. Бо ку мнѣ до автобуса присѣв змозоленый роботник и, неборак, спав за цѣлов божов драгов.
Жерело: Радио Патрия, 19.12.2010, адаптовано