1913 Чистота

В передовцѣ новинкы редактор филозофуе о чистотѣ в шыроком понятю того слова, розумѣючы под тым вшыткы позитивы, котры так часто хыблят Русинам: култура, образованость, цивилизация, достойность.  

     Бесѣдуйте, што хочете, али чистота есть перва в житю чоловѣка. Як приятно зъѣсти з  чистого гратка, хотя и убогу страву, як приятно ввойти до чистенькой хыжы, як приятно видѣти чисто убраного ци хлопа, ци женщину!...

     А зась як мерзка нечистота! Там де дома не чисто, де вшытко брудное, начиня не мытое, хыжа незаметена, газдыня прибрана брудно, та хотя бы давала ѣсти «марципаны», пити «каву» и «гарбату», та то не лѣзе до горла, бо нечисто!... Сто разы приятнійша, сто разы милѣйша бѣда а чиста, як роскош а брудный. Сто разы я волѣю ввойти под чисту соломяну або гонтяну стрѣху, як до нечистой камняницѣ.

     Али нас ту болше заимат село. В цѣлови нашы села дѣлят ся на села чисты и нечисты. Не хочу тут вычисляти села чисты и нечисты, жебы ся люде не гнѣвали, али так направду есть. Был ем уж в том селѣ и в том селѣ, в той хыжѣ и в той, видѣл таку газдыню и таку, был у богатых и бѣдных, видѣл чистоту и нечистоту... Идете дорогов... Идете през едно село, люде чисты, веселы, обыстя заметеное, порядок, ввойдете до хыжы – выбѣлено, выстелено, газдыня чистенька, лем ся цѣловати хоче, а люде в таком селѣ – аж ся сердце радуе! – не рабы, не биют кланячку еґзекутору, ани жандареви, не гнут ся во двое пред первым-лѣпшым урядником, не лижут по руках егомосцѣв, бо каждый знает собѣ цѣну, каждый розумѣет, же мает такы самы права до божого свѣта, як другы люде.

     Ждийте, бо мы зачали о чистотѣ. Идете през другое село: през дорогу плыне гноевка, на оборѣ гной, на статку гной, на газдынѣ гной... Повылѣтуют дѣти прикурены, чорны, як коминарьчикы... Ба, та што ся дивовати дѣтем, коли през окно вызират мама, як кавка, а няньо, як ворон... Коли хочете до такой хыжы ввойти, то выдыхайте ся добрѣ на дворѣ, потом наберте до себе воздуха на «мерендю», призвийте на помоч всѣхъ святых – и так ввойдте. Коли вам дяка та посмотте до гратков, посмотте до якых горнци молоко цѣдят, де го складуют, та коли тото вшытко ввидите, та як есте чоловѣк переимливый, то нич лем три дны не будете ѣсти…

     Из  такых то сел выходят люде хворовиты, здохлякы. Там николи не есть правдивой веселости, каждый похыленый, смутный, жде смерти. А причинов того есть нечистота.

     Звѣдате ся: «А што есть причинов нечистоты?» Куртый одвѣт: «Темнота!»

    Так есть, темнота причина нечистоты. Али не лем нечистоты! Темнота есть причинов всякой бѣды, всякого горя, темнота, то найболшый ворог русского народа! Темнота причинов рабства, темнота причинов того, же нас не цѣнят, з нами не рахуют ся.

     Все мает русскый народ, мает силу, мает землѣ достатком и богатой, русскый народ способный, роботный, хыбит му лем едного до щастя, недостает му просвѣщения.

     Темнота прилягла русскый народ. Она причинов усякого зла, она причинов нашой неволѣ, нашого рабства. Первый враг твой, русскый народе, то темнота. Ставай, народе с тым ворогом до борьбы, побѣди его, а будучность твоя! И то будучность щастлива, богата.

Лемко, 1913, №26