Го-о-оп!

Року 2010 Петро Трохановскый, познатый русинскый литератор з Лемковины, зробил великый крок ку реализации своей прекрасной идеи – выдати творы русинской классикы. Иде о книжку «Русенко. Выбране», збудовану дость оригинално. Дотеперь знали сьме о Русенкови, як о добром поетови, чоловѣкови великого сердця и твердого лемковского пересвѣдченя. З материалов, зобраных в книжцѣ можеме ся дознати и о иншых сторонах творчости великого Лемка, межи иншым, же был и прекрасным илустратором. Туй представляна гумореска Русенкова е илустрована рисунками самого автора. Ужывайте собѣ!

Ваньо Дудра ѣхал до Горлиц з дрывами. Коли уж был на Магурѣ, станул и зашлайфовал, бо гора – не дай Бог – страшна. Кедь не загамуеш, можеш забити коня, воз поламати, ай себе покалѣчити, ба – ай забити. Ваньо, хоть небоячый хлоп был, зашлайфовал моцно, притягнул мотуз, сѣл на дрыва и – вйо помаленькы. Гора штораз барже спадиста, але шлайфа тримат.

Смотрит Ваньо вперед и видит – иде Жыд Мошко, о якы полкилометра пред возом. Несе два кошы в обох руках, видав, яйця. Як Ваньо уж ближе Жыда подъѣхал, кричит, як звычайно каждый фурман: „Гооп, гооп!" – жебы ся Жыд усунул. Але Жыд ани ся не обозрил, лем якбы нич не было, иде собѣ дале серединов дорогы. А Ваньо кричит фурт: „Гооп, гооп!". И уж подъѣхал на Жыда лем на пару кроков и кричит... Аж ту наглѣ – трѣсь! Шлайфа ся зламала. Ваньо скочил на землю, бо притомный был, жебы даяк подтримати воз – бо бѣда. Але конь пустил спераня тай – дырды з горы. Ваньо не пустил през то лѣцы з рук, лем тримат и попри возѣ летит, коня притримуе, жебы до шанца не звернул. А наш Мошко ани ся не обозрил, ливч завадил о Мошков кош, и то так моцно, же аж Мошка перевернул – з кошами и з яйцями. Кош упал под колесо так, же нараз стримало воз. Вшыткы яйця ся розбили, а было их зо штыри копы.* Дорога – аж жовта од яичницѣ. Люде, што недалеко робили в полю, позлѣтовали ся и смѣют ся – аж страх! И з Ваня, и зо Жыда. Жыд тымчасом уж встал обабраный яйцями, вайчит – не дай Боже – и гварит до Ваня:

–Но, фурман, як вы идете, ци сьте слѣпый, ци не мате очи? Смотьте – што сьте наробили! Будете ми заплатити за яйцѣ!

–Фраса ти буду платил – гварит Ваньо – чом есь ся не усунул? Тадь я кричал од полгоры: «Гооп, а гооп!!!» Та чом есь ся не усунул?!

–Но, – гварит Жыд – што значит «гооп!»? Я не знаю, што значит «гооп!» – Ты, Ваню, могл есь преця ѣхати коло шанца и оминути мене, а не просто на мене ѣхати. Я иду на суд и буду заскаржити, ты заплатиш за шкоду – ту свѣдкы сут.

–Но, но, – гварит Ваньо – чекай, аж ти заплачу, глупый Мошку! Можеш заскаржити, не бою ся!

И поѣхал дале до города. А Жыд тоже взял порожны кошы – и до суду.

За якы два тыждни Ваньо достал вызов до суду. Но, требало идти, бо иншак – кара. Думат собѣ: «Бѣда, Жыд годен ищи выйграти!».

Иде смутный Ваньо – дошол аж до Ропицѣ Руской, ту стрѣтил го кум Фецько.

–Як ся мате, куме? – гварит Фецько.

–Та, знате, дос плано, куме, так и так, – и оповѣл Ваньо цѣлу историю з яйцями.

Подумал кус кум Фецько и гварит:

–Нич ся не бойте, куме, лем робте так як я вам повѣдам: кедь придете до суду, не бесѣдуйте нич. Хоть ся вас судя буде дашто просил, не бесѣдуйте ани слова. А Жыд най бесѣдуе што хоче! Лем памятайте, што вам повѣдам.

–Но, добрѣ, – гварит Ваньо.

Пришол Ваньо до суду, а Жыд уж там! Почекали кус – Жыд нич не бесѣдуе до Ваня, лем собѣ бороду гладит и шпацируе, увѣреный, же выиграт. За полгодины вызыват урядник:

–Мошко Фиш, Ваньо Дудра!

Идут оба, стали перед судем. Жыда первого просит ся тот – як то было.

–Но, пан сендзя, я иду собѣ дорогов и несу собѣ два кошы яйцѣ. А тот паскудник Ваньо – просто въѣхал на мой яйцѣ и розбил вшыткы. Он ми тераз мусит заплатити за шкоду.

–Добрѣ, – гварит судя, – а ты, Ваньо Дудра што на то?

Ваньо стоит и смотрит, як глупый, на судю и ани пискне.

–Но, бесѣдуй же, – гварит судя, – ци-сь нѣмый?

А наш Ваньо нич, ани слова!

–Жыде, – гварит судя, – ци Ваньо Дудра направду не може бесѣдовати?

–Де бы нѣт? – гварит Мошко. – Не лем знае бесѣдовати, але потрафит кричати, же го чути на милю! Як ѣхало з горы, та кричало: «Гооп, гооп!» – аж ми уха звонили, а теперь же не може?!

–Кедь так то е, – гварит судя, – ты, Ваню Дудра, выиграл. А ты, Жыде, вернеш судови кошт и Ваневи за дорогу и за страченый день пять злотых.

Так ся справа закончила.

Вышол Ваньо зо суду, а кум Фецько уж чекат пред брамов:

–Но, як там, куме, вышло?

–Добрѣ! – гварит кум Ваньо. – Подьме на пиво. И руслика закусиме.

А Жыд вышол тоже, ударил ся палцем по чолѣ и повѣдат:

–Ага, теперь то уж знам, же «Гооп, гооп!» – то значит: усунь ся ку шанцу!

----------

*) Копа (ист) – 60 кусов.

Жерело: Петро Трохановскій (ред.). Русенко. Выбране. Бібліотека Бесіды 22.
Стоваришыня Лемків. Крениця–Ліґниця. 2010.
 Оригинално: под псевдом Сват, «Карпаторусскій календар Ваня Гунянкы на 1931 год», с. 64-66.