Лемковина

«Русенковы творы вшыткы написаны лемковсков русинчинов, и его поезия особено задержала дух лемковской трапезы перед вонкашныма силами, над якыма Лемкы не мают власти»

Богдан Горбаль

Каменисты пути и потокы рвучы,

Березовы дебри и лѣсы дремучы,

Кычеры высокы, поляны зелены,

Пропастны ростокы, зрубы пороснены.

А школы маленькы, хыжы деревляны,

Дѣточкы босенькы — люде застараны.

Кус голузя на оборѣ — а пусто в коморѣ,

Темно в хыжы — смутно смотрят иконы на стѣнах,

Коло пеца бренчат мухы, гуси-куре в сѣнях.

Кус дерева за стодолов — на купѣ чатина,

Бѣда смотрит через выгляд — ОТО ЛЕМКОВИНА.

***

Я родил ся твоим сыном,

Доля моя бѣдна,

И люблю тя, Лемковино,

Моя мати родна.

И хоть земля наша бѣдна,

Доля незавидна,

Не забудут мои очы

Тихых горскых ночей,

Ани сердце не забуде,

Покля жыти буде.

Бо ци-м годен позабыти,

Нашу горску красу,

И смеречкы и поляны,

Де ся овцѣ пасут,

И чорницѣ и яфыры,

Ягоды, малины? ...

Верабоже, не забуду

Нигда Лемковины.

Шумлят лѣсы, йграют пѣснѣ,

Гей, за давны вѣкы,

А яличкы ся кланяют,

Смерекам столѣтным.

Хмары плынут понад горы,

Тихѣцько як гуси,

Понад горы, понад лѣсы,

Аж с Карпатской Руси.

От Тячова, Ужгорода,

През Гуменне — Пряшов,

Плынут ку нам милы хмаркы,

З вѣсточков од нашых.

Идут дале ку Щавници,

През татранскы турнѣ,

През Шляхтову, Бѣлу Воду

Гет аж ку Остурни.

А лѣс шумит, пѣсню спѣват,

И слухают хмары,

О волѣ, о прошлой славѣ,

И о часах старых.

Там в ростоцѣ видно село

Далеко пред нами —

Малу хыжку, стару школу,

И под бляхов корчму.

Сонце сѣло за Кычеров,

И вѣтер уж стихат,

Лѣс спокойный пред вечером

И легко оддыхат.

Роса падат, мѣсяц зышол,

Тишина на селѣ —

Лем здалека чути йграня

Цыганской капелы.

Я вас люблю, як и своих,

Цыганы-Романы,

Вас, голодных

И обдертых,

И споневѣряных.

Не мате своей отчизны,

Нигде не признаны,

Лем любите нашы горы,

Бѣдуете з нами.

И бѣдны сьте вы, гудакы,

Без землѣ, без роду —

Як я люблю ваше йграня
И вашу слободу!