Погар

Погар ’рус. стакан, укр. склянка’ есть доста рос­ши­ре­ным словом и за гра­ни­ця­ми Карпатской кот­ли­ны. У Ру­синох мае еще другое значеня ’чаша, ку­бок’, пе­ре­важно у войводинскых Русинох, ачей под юж­но­сла­вянскым вплывом. В ин­шых вос­точ­но­сла­вян­скых язы­ках слово не по­зна­тое.^*) Сла­вянскы ети­мо­логы як же­рело на­зы­ва­ють мад.  po­hár < давно­нѣ­мец­к. behhari < лат. bi­ca­rium < грец. βίϰοϛ. Ин­те­рес­но, же ма­дяр­скый ети­мо­лог Гейза Бар­ци поважуе, же Ма­дяре пе­ре­брали то­то слово од юж­ных славянох, а не прямо з давно­нѣ­мец­кого. Слово есть давного по­зы­ченя, з до­бы старославянской, за что свѣд­чать слова пе­харь ’ча­ша, кубок’ и пехарьникъ ’чопнарь’, якы находят ся в дав­но­сербскых же­ре­лах. Но лем у Словакох pohár жие в обох значенях, як и у Ру­синох. У Бол­га­рох па­хар, Македонцьох, Сербох – пехар, Полякох – puchar, Сло­вин­цьох – pehar, у Че­хох – pohár, такой вся­гды лем в значеню ’кубок, чаша’.

------------------------

*В украинскы словникы, правда, слово записано як диалектное и неповным опи­сом, але стрѣ­чать ся оно лем в русинской литературѣ, на котру тоты слов­ни­кы ся одкликують. На при­мѣр:

ПОГАР 2, а, чол., діал. Кубок, келих. — Жінко, принеси погари, вип'ємо з Юрком за щастя Ганьки і Степана (Михайло Томчаній, Жменяки, 1064, 223).

Словник української мови: в 11 томах. — Том 6, 1975. — Стор. 705.