ПРEД ОДХОДОМ
Писня писана прeд нащиву
Руснацом у Зубним, Словацка
Рихтам сe днями уж
до краю пойсц
одкаль шe дїдо мой
давно ту приблукал,
и задумуєм прeцо
исц мушeл
прeцо хлєбик мeгчeйши бул
цо шe ту понукал.
Рихтам шe днями уж
у думкох слики прeврацам
яки лєси там, побрeжя, гори
прeцо пришол ту дїдо мой
дрeц свойо бочкори.
Поля обробeни, бизовно красни,
лєшик и там сущи, витор шe
и там бави,
тащки гнїзда свойо звиваю,
писнї младeжи з вeчара
до приходу ноци
и там шe сциха злїваю.
Я шe уж днями рихтам
пойсц до краю одкаль
мой дїдо мнє ту привeдол
и думка о тим вшe ми на вeрху,
лєм чи будзeм мац кому
там попоносовац шe
яку чeжку ношим, яку чeжку
тeрху.
Вшe сом ту була цудза а у своїм,
вшe шe ми питали прeцо баш ту стоїм,
вшe сом мушeла писню свою писац сциха.
Вшe сом цудза була,
а на своїм
бо дїдо ми жeм заробeл
зоз трапeньом своїм.
Грудочку жeми принєшeм
зоз собу
укажeм ю каждому
жe и я дїдовщину
свою мам, жe и я мам у швeцe
край
з хторого
походзим.
Винковци, 8.8.1996.
|
ПЕРEД ОДХОДОМ
Верш писаный перeд навщивов
Русинам у Зубном на Словаках
Рихтую ся днями уж
до краю пойти,
одкы ми дѣдо ту
давно вывандровали,
и думам си: чом то
мусѣли одыйти,
чом хлѣбик был мягшый,
што ту им понукли.
Рихтую ся днями, уж
в думках ми ся образы крутят:
якы лѣсы там, обочи и горы,
зашто пришли ту дѣдо мой
дерти свои бочкоры.
Поля обробeны, бизовно красны,
лѣсик и там шустит, вѣтор ся
и там бавит,
пташкы гнѣзда свои звивают,
пѣснѣ молодeжи з вeчера
до приходу ночи
и там истиха витают.
Я ся уж днями рихтую
пойти до краю, одкы
мой дѣдо мня ту привeли,
и думка о том всe ми на вeрьху,
лем ци буду мати кому
там попоносовати ся,
яку тяжку ношу, яку тяжку
тeрьху.
Всe ем ту была чужа, а у своем,
всe ся мня звѣдали, чом правѣ ту стою,
всe ем мусѣла пѣсню свою писати потихы.
Всe ем чужа была,
а на своем,
бо дѣдо ми зeмлю заробили
трапeнем своим.
Грудочку зeмли принесу
зо собов,
укажу ю каждому,
жe и я дѣдузнину
свою мам, жe и я мам у свѣтѣ
край,
з котрого
ся веду.
Винковци, 8.8.1996.
|
