Вапа

Рѣдкостное днесь слово вапа означае: стояча вода, болото. В давных памят­ни­ках зафиксовано в Супрасльском рукописѣ, ст. 193, 12 (11. вѣк): «видѣ мѣсто нѣкако • акы вапу сушту исякшу • и тины смрьдяшту пльну». Од праславян­ско­го *vapa ’стояча вода, болото’.

Федор Потушняк пише (Оповѣданя, 1942): «Подойшла над саму вапу и стала. Николи сюды не заходила, бо кто бы дурный у вапу лѣзти.» (Така…); «Свинѣ лѣниво полѣгали въ вапу и поснули.» (Чужѣ люде).

Окрем Русинов сесе слово днесь познают Словенцѣ и Мадяре (послѣдны за­зна­чу­ют, же слово vápa по­зычили од славянов), з котрыма Русины довгый час жили в’едно. Тыж интересно, же в Вологодской об­ласти на лепаву, не­хар­ну жену говорят: ваплюха.

Напротив того, широко хоснованое в славянскых языках слово вапно одводит ся од праславянского *vapъ ’фарба’ понеже в давности славяне хос­но­ва­ли вап­но на бѣленя стѣн, а не на мурованя. Давнорусское жерело: вапь (ж. рода), але днесь ме­жи восточныма славянами у Русов то слово уже ся вытратило. Дакотры ети­мологы по­ва­жуют, же оба тоты слова мают общое жерело, але, як видиме, не суть на то пе­ре­свѣдчивы доказы.